पारनेर : पारनेर अपडेट मिडिया
अध्यापनाबरोबरच सोपवलेली प्रत्येक जबाबदारी प्राथमिक शिक्षक प्रामाणिकपणे पार पाडतात.करोना संसर्ग काळात शिक्षकांनी उल्लेखनीय काम केले.असे प्रतिपादन गट शिक्षणाधिकारी बाळासाहेब बुगे यांनी केले.शिक्षक प्रामाणिकपणे काम करीत असल्याने त्यांच्यावर विविध जबाबदाऱ्या सोपवण्यात येतात अशी पुस्तीही बुगे यांनी जोडली.
प्राथमिक शिक्षक संघ व गुरूमाऊली मंडळाच्या वतीने जिल्हा परिषद आदर्श शिक्षक पुरस्कार प्राप्त शिक्षक तसेच विविध क्षेत्रात उल्लेखनीय काम केलेल्या शिक्षकांचा सन्मान करण्यात आला.त्याप्रसंगी बुगे बोलत होते.अध्यक्षस्थानी गुरूमाऊली मंडळाचे जिल्हाध्यक्ष राजकुमार साळवे होते.शिक्षक संघाचे जिल्हाध्यक्ष बापूसाहेब तांबे, कार्याध्यक्ष गोकुळ कळमकर,शिक्षक बॅंकेचे अध्यक्ष सलीमखान पठाण,माजी अध्यक्ष साहेबराव अनाप,कारभारी बाबर,विठ्ठलराव फुंदे,श्रीमती अंजली मुळे, चंद्रकांत गट,मंगेश खिलारी आदी उपस्थित होते.
बुगे म्हणाले की,करोना बाधित रुग्णांच्या संपर्कातील व्यक्तींचा शोध घेणे,माझे कुटुंब माझी जबाबदारी उपक्रमाचा घरोघरी जाऊन प्रचार करणे,आरोग्य कर्मचाऱ्यांना मदत करणे अशी विविध कामे शिक्षक करीत आहेत.दूरश्राव्य पध्दतीने अध्यापनाचे कामही सुरू आहे.विद्यार्थी व्यवस्थीत अभ्यास करतात किंवा नाही हे तपासण्यासाठी,त्यांच्या अडचणी सोडवण्यासाठी गृहभेटी सुरू आहेत.अध्यापनाची बरोबरच इतर शैक्षणिक कामे शिक्षक प्रामाणिकपणे पार पाडीत आहेत.करोना संसर्गाबरोबरचे युद्ध अद्याप संपले नसल्याने शिक्षकांनी सतर्क राहावे असे आवाहन बुगे यांनी केले.
नशिक्षक संघाचे जिल्हाध्यक्ष बापूसाहेब तांबे म्हणाले की,जिल्हा परिषदेचा आदर्श शिक्षक पुरस्कार प्राप्त शिक्षक खऱ्या अर्थाने या पुरस्काराचे हक्कदार आहेत.उत्कृष्ट अध्यापनाबरोबरच चाकोरीबाहेर जाऊन या शिक्षकांनी विद्यार्थी घडवण्याचे काम केले.अध्यापनाचे काम करीत असताना समाज, विद्यार्थी हितासाठी त्यांनी विविध उपक्रम राबवले त्यांच्या या कामाची पावती त्यांना मिळाली आहे.जिल्ह्यात अनेक शिक्षक विविध क्षेत्रात उल्लेखनीय काम करीत असतात.मात्र सर्वांना पुरस्कार मिळत नाहीत.अश्या शिक्षकांचा गौरव करण्याचा, त्यांना प्रोत्साहन देण्यासाठी सन्मान करण्याचा शिक्षक संघाच्या पारनेर शाखेचा उपक्रम स्तुत्य असल्याचे तांबे म्हणाले.
गुरूमाऊली मंडळाचे जिल्हाध्यक्ष राजकुमार साळवे,शिक्षक बॅंकेचे माजी अध्यक्ष गोकुळ कळमकर, अनाप आदिंची भाषणे झाली.
