मतदानासाठी दिवसभर रांगा : कोणताही अनुचित प्रकार नाही
पारनेर : पारनेर अपडेट मिडिया
पारनेर नगर पंचायतीच्या चार प्रभागांसाठी झालेल्या अटीतटीच्या निवडणुकीत एकूण २ हजार ८११ मतदारांपैकी २ हजार ४६४ मतदारांनी हक्क बजावला.एकूण ८७.६६ टक्के मतदान झाले.
प्रभाग क्रमांक १४ मध्ये दुरंगी,प्रभाग क्रमांक ११ मध्ये बहुरंगी तर प्रभाग क्रमांक २ व १३ मध्ये राष्ट्रवादी काँग्रेस, शिवसेना व शहर विकास आघाडी अशी तिरंगी लढत झाली.अत्यंत चुरशीने झालेल्या निवडणुकीत मतदानासाठी मतदारांनी मतदान केंद्रांवर सकाळ पासून रांगा लावल्या होत्या.सर्वच मतदान केंद्रांवर दिवसभर मतदारांच्या रांगा लागल्याचे चित्र होते.शहराच्या परंपरेप्रमाणे अत्यंत शांततेत निवडणूक पार पडली.कोणताही अनुचित प्रकार घडला नाही.
दरम्यान, आज झालेल्या चार प्रभागांसह एक महिन्यापूर्वी झालेल्या तेरा प्रभागांची मतमोजणी उद्या (बुधवारी) सकाळी १० वाजता पारनेर बाजार तळावरील डॉ.बाबासाहेब आंबेडकर सभागृहात होणार आहे.एकूण तीन फेऱ्यांमध्ये मतमोजणी होणार असल्याची माहिती निवडणूक निर्णय अधिकारी तथा उपविभागीय दंडाधिकारी सुधाकर भोसले व सहायक निवडणूक निर्णय अधिकारी डॉ.सुनीता कुमावत यांनी दिली.अवघ्या एक तासात,सकाळी ११ वाजेपर्यंत सर्व प्रभागांचे निकाल जाहीर होणे अपेक्षित आहे.
प्रभाग निहाय झालेले मतदान पुढीलप्रमाणे (कंसात प्रभागातील एकूण मतदान) प्रभाग क्र.२-८४६ (९४८) प्रभाग क्र.११-३६५ (४४२) प्रभाग क्र.१३-६१० (७०२) प्रभाग क्र.१४-६४३ (७२०)
५५ उमेदवारांचे भवितव्य
पारनेर पंचायत समितीच्या माजी सभापती जयश्री औटी, माजी उपनगराध्यक्ष चंद्रकांत चेडे, नगरसेविका सुरेखा भालेकर,विजेता सोबले,वैशाली औटी, विद्यमान नगरसेवक नंदकुमार औटी यांच्या पत्नी मयूरी औटी,व्यापारी संघटनेचे अध्यक्ष अशोक चेडे,विजय औटी या प्रमुख उमेदवारांसह यांच्यासह ५५ उमेदवारांचे भवितव्याचा निर्णय उद्या मतमोजणीत होणार आहे.
कोव्हिड उपाययोजनांचा बोजवारा
राज्यातील भाविकांचे श्रद्धास्थान असलेल्या तालुक्यातील पिंपळगाव रोठे येथील कोरठण खंडोबाच्या यात्रोत्सवानिमीत्त विविध धार्मिक कार्यक्रम सुरू आहेत.या कार्यक्रमांना उपस्थित राहणाऱ्या भाविकांसाठी आरटीपीसीआर तपासणी, लसीच्या दोन्ही मात्रा, सामाजिक अंतराचे पालन आदी कोविड प्रतिबंधक उपाययोजनांची सक्ती करण्यात आली आहे.मात्र नगर पंचायत निवडणुकीच्या प्रचारादरम्यान तसेच मतदानाच्या वेळी कोविड प्रतिबंधक उपाययोजनांचा पुरता बोजवारा उडाल्याचे चित्र होते.
