जवळ्यात दारूबंदी करा म्हणणारेच झिंगले !

दारूबंदी समितीची स्थापना , धाब्यांवर छापे

जवळे : पारनेर अपडेट मिडिया

जवळे ता पारनेर येथे नुकत्याच घडलेल्या खुन प्रकरणामुळे ग्रामस्थांनी तातडीने दारूबंदी समितीची स्थापना केली . या
समितीने लगेचच कामकाज चालू केले व रविवारी रात्री गावातील दारूविक्री होत असणाऱ्या धाब्यांवर छापे टाकले . त्यावेळी त्यांना तिथे गावातील प्रतिष्ठीत दारू पिताना आढळून आले . विशेष म्हणजे तेथे दारू पीत झिंगलेलेच जवळ्यात दारूबंदी करा असा आग्रह करत होते !

समितीच्या सदस्यांना पाहताच त्यांनी आपले तोंड दडवत पळ काढला तर काहींनी पुन्हा नाही दिसणार असे म्हणत दिलगीरी व्यक्त केली . समितीच्या सदस्यांनी यावेळी या
मद्यपिंना समज देण्याची भुमिका घेतली . पुन्हा दिसले तर पोलिसांना बोलावून थेट गुन्हा दाखल करण्यात येणार असल्याचे सांगितले .

यावेळी पुरावे म्हणून सर्व घटनेचे मोबाईलद्वारे चित्रीकरण करण्यात आलेले आहे . प्रसंगी ते आम्ही ग्रामसभेत सादर करू अशीही भुमिका समितीने घेतली आहे . गेल्या महीनाभरापूर्वी गावातील याच मद्यधुंद पदाधिकाऱ्यांनी पोलिस निरीक्षक घनश्याम बळप यांना गावात दारूबंदी करण्यासाठी प्रत्यक्ष भेटुन पत्र दिले होते . आज मात्र तेच पदाधिकारी गावातील याच धाब्यांवर मद्य प्राशन करताना आढळले !

जवळे गावात असणारे अधिकृत दारूचे दुकान गेल्या पंचविस वर्षापुर्वी बंद केले होते . तेव्हापासुन पुढे बरेच दिवस गावात दारूबंदी लागू होती . महीलांनी चार वर्षांपूर्वी गावात दारूबंदी साठी मोठे आंदोलन केले होते . त्यामुळे दारूबंदी साठी जवळे गाव नेहमी पुढाकार घेताना दिसते .
परंतु अलिकडच्या काळातील गावकारभारी मात्र यास फारसे अनुकुल नाहीत हे कालच्या घटनेवरून अधोरेखीत होते . कारण माजी सरपंच , आजी माजी चेअरमन , उपसरपंच , सरपंच पती , तंटामुक्ती , आजी माजी पंचायत सदस्य व सदस्स पती राजकीय पक्षाचे पदाधिकारी , प्रतिष्ठित बागायतदार काल या वेळी दारू बंदी समितीला आढळून आले . यावरून गावात समाजासमोर दिवसा दारूबंदीची मागणी करणारे यांचा मात्र दारू साठी रात्रीस खेळ चाले हे दिसून आले . जवळे दारूबंदी समितीचे अध्यक्ष रायचंद आढाव यांच्या अध्यक्षतेखाली धाब्यांवर छापे टाकण्यात आले .